រដ្ឋាភិបាលកម្ពុជាសម្រេចឲ្យបង្កើត ឧទ្យានជាតិសមុទ្រកោះរ៉ុងដែលមានទីតាំងនៅខេត្តព្រះសីហនុ និងខេត្តកោះកុង។
រដ្ឋាភិបាលបានចេញអនុក្រឹត្យមួយចុះថ្ងៃទី០៨ ខែកុម្ភៈ ឆ្នាំ២០១៨ បានសម្រេចបង្កើតឧទ្យានជាតិសមុទ្រកោះរ៉ុងដែលមាន កោះរ៉ុង កោះរ៉ុងសន្លឹម កោះកូន កោះតូច កោះតាទៀម កោះម្នាស់ក្រៅ កោះម្នាស់ក្នុង និងសមុទ្រជុំវិញ ដែលមានផ្ទៃសរុប ៥២,៤៤៨ហិកតា។
តាមអនុក្រឹត្យដដែលឧទ្យានជាតិសមុទ្រកោះរ៉ុងនោះស្ថិតក្នុងភូមិសាស្ត្រខេត្តព្រះសីហនុ និងខេត្តកោះកុង ដោយក្នុងនោះមានផ្ទៃដីទំហំ៥៣១១ហិកតា និងផ្ទៃទឹកសមុទ្រទំហំ ៤៧,១៣៧ហិកតា ដូចមានផែនទីភ្ជាប់មកជាមួយ។
តាមអនុក្រឹត្យការដាក់តំបន់នេះឧទ្យានជាតិសមុទ្រកោះរ៉ុង មានគោលបំណង ធានាការថែរក្សា និងការពារសោភ័ណភាពធម្មជាតិ វប្បធម៌ ប្រព័ន្ធអេកូឡូស៊ី និងជីវៈចម្រុះលើកោះ និងបរិវេណសមុទ្រជុំវិញ ផ្តល់ផលិតផល និងសេវាកម្មធម្មជាតិ សម្រាប់ការប្រើប្រាស់ប្រកបដោយនិរន្តរភាព រក្សាលំនឹងបរិស្ថាន ការពារ និងអភិរក្សធនធានធម្មជាតិ និងរួមចំណែកកាត់បន្ថយការប្រែប្រួលអាកាសធាតុ និងហានិភ័យគ្រោះមហន្តរាយធម្មជាតិ។
ជាមួយគ្នានោះក៏លើកកម្ពស់ការចូលរួមរបស់សហគមន៍មូលដ្ឋាន ក៏ដូចជាសាធារណជន ក្នុងការរួមចំណែកដល់ការគ្រប់គ្រង ការការពារ និងការអភិរក្សជីវៈចម្រុះ និងធនធានធម្មជាតិក្នុងតំបន់ ៕